У звароце да генэральнага пракурора праваабаронца пазначыў, што лічыць «практыку адмовы ў наданьні статусу ўцекача Міністэрствам унутраных справаў Грузіі ўсім грамадзянам Беларусі дыскрымінацыяй паводле прыкметы нацыянальнага паходжаньня і злачынствам, прадугледжаным артыкулам 1421 Крымінальнага кодэксу Грузіі (расавая дыскрымінацыя)».
Кісьляк просіць «правесьці праверку фактаў адмовы грамадзянам Беларусі ў наданьні прытулку», а таксама «завесьці і расьсьледаваць крымінальную справу» і «прыняць меры для спыненьня практыкі расавай дыскрымінацыі беларусаў у пытаньні атрыманьня статусу ўцекача».
«МУС і Дэпартамэнт міграцыі адмаўляюць усім беларусам у статусе ўцекачоў. Гэта мае масавы характар. На ўсе звароты ідуць адмовы», — канстатаваў Кісьляк ў размове з «Позіркам».
«Мы быццам бы нябачныя. Нашых праблемаў не заўважаюць. Нам усім адмаўляюць. Мы лічым гэта дыскрымінацыяй. Ёсьць злачынства, хай пракуратура расьсьледуе, Офіс народнага абаронцы займаецца», — кажа праваабаронца, які жыве ў Грузіі.
26 сакавіка 2025 году суд у Тбілісі часткова задаволіў скаргу Рамана Кісьляка на адмову яму ў прытулку. Суд скасаваў рашэньне міграцыйнага дэпартамэнту Грузіі аб адмове Кісьляку ў прытулку.
У 2019–2024 гадах Грузія не задаволіла ніводнага хадайніцтва беларускіх грамадзян аб наданьні прытулку.
ГЛЯДЗІЦЕ ТАКСАМА: «Пратрымалі паўтары гадзіны, далі паперу па-грузінску». Гісторыя яшчэ аднаго беларуса, якога не пусьцілі ў Грузію пасьля «візарана»