Як паведаміла выданьне delfi.lv, сярод такіх аб’ектаў — сыстэмы і іх часткі, разьмешчаныя ў Латвіі і неабходныя для выкананьня важных грамадзкіх функцыяў, а таксама для абароны здароўя, бясьпекі, эканамічнага ці сацыяльнага дабрабыту людзей.
Грамадзяне Беларусі і Расеі ня змогуць працаваць на пасадах, зьвязаных з допускам да інфармацыі або тэхналягічнага абсталяваньня, неабходных для функцыянаваньня крытычнай інфраструктуры. У той жа час закон прадугледжвае, што беларусы і расейцы змогуць працаваць на такіх аб’ектах толькі на падставе асобнага дазволу, выдадзенага ад нацыянальнага органу бясьпекі.
Апроч таго, заканадаўчыя зьмены прадугледжваюць, што грамадзяне Беларусі і Расеі ня змогуць стаць уласьнікамі, бэнэфіцыярамі ці кіраўнікамі аб’ектаў крытычнай інфраструктуры эўрапейскага значэньня.
Забарона для грамадзян Латвіі выяжджаць у Беларусь і Расею
Яшчэ адным ухваленым 12 чэрвеня законам «Аб абмежаваньні дзеяньняў, што пагражаюць нацыянальнай бясьпецы» парлямэнт забараніў супрацоўнікам дзяржаўнага кіраваньня Латвіі выяжджаць у Расею і Беларусь.
Забарона закране тых асобаў, якія атрымалі дазвол на доступ да дзяржаўнай таямніцы ў сфэры бясьпекі крытычнай інфраструктуры, супрацоўнікаў Міністэрстваў абароны, унутраных справаў і юстыцыі, установаў, што ім падпарадкоўваюцца, і вайсковых аб’ектаў, прадстаўнікоў падатковай і мытнай паліцыі, супрацоўнікаў дыпляматычнай і консульскай службы, а таксама пракуратуры і судоў.
Закон прадугледжвае, што парушэньне забароны на выезд будзе лічыцца падставай для скасаваньня працоўных дачыненьняў.
Сёлета вясной улады Латвіі ініцыявалі ўвод такіх забаронаў, урад распрацаваў адпаведны законапраект.
Два тыдні таму Латвія забараніла ўезд на сваю тэрыторыю некаторым грамадзянам Расеі, якія валодаюць нерухомасьцю побач з стратэгічнымі аб’ектамі.
Форум